ரமண மஹரிஷியுடன் நான் – 9 – சஞ்சீவ ராவ்

Read the English version here.

9
பி. சஞ்சீவ ராவ், பி.ஏ (Cantab.) சுதந்திரத்திற்கு முந்தைய இந்தியாவின் கல்வித் துறையில் இருந்தவர்

பகவான் ஸ்ரீ ரமண மஹரிஷி ஒரு வினோதமானவர் – மிக மிக வினோதமானவருள் ஒருவராய் இருப்பினும் எக்காலத்திலும் அளப்பரிய ஆச்சர்யத்தைத் தருபவர்களுள் ஒருவர். பார்க்கப் போனால் அவர் எந்தக் காலத்துக்கும் குறிப்பிட்டுச் சொல்லும்படியாக விளங்குபவரல்ல, அனாதிக்கு ஒப்பானவர், எக்காலத்திற்கும் ஏற்றவர்.

மஹரிஷி இவ்வுலகம் எதையெல்லாம் விலை மதிக்க முடியா உயர்ந்தது என்று கருதுகிறதோ அதையெல்லாம் விலையற்றது என்று ஒதுக்கி விட்டவர். பணத்தினால் அவருக்கு ஒரு பயனுமில்லை. பதவி, சமுதாய அந்தஸ்து இதையெல்லாம் கண்டு கொள்பவரல்ல அவர். அவருடைய பற்றற்ற நிலை பூர்ணமானது, மிக உன்னதமானது. அவருடைய தெய்வீக அமைதியை குலைக்கும் சக்தி எதற்கும் இருப்பதாய் தெரியவில்லை. சோகம் என்பது அவரைத் தனிப்பட்ட முறையில் பாதிப்பதில்லை. ஆண்டுதோறும் கார்த்திகை மாதம் அண்ணாமலை கார்த்திகை தீபம் ஏற்ற வரும் அடியார்கள் அண்ணாமலையை அந்த ஆதிசிவனாகவே வழிபடுவது வழக்கம். அவர்கள் அதே ஆதிசிவனின், அண்ணாமலையின் சக்தி மஹரிஷியிடம் இருப்பது கண்டு அண்ணாமலைக்கு, ஆதிசிவனுக்குத் தரும் அதே மரியாதை, பக்தியை அவருக்குத் தருகிறார்கள். அம்மலையின் இதயக்குன்றுக்கு ஈடான காலத்தால் ஒப்பிட முடியா ஞானம் அக்கண்களில் ஒளிவீசுகிறது, அதில் ஈடு இணையற்ற பேரமைதியும் அதே சமயம் உலகம் அனுபவிக்கும் துன்பங்களைக் கண்டு கருணையும் ஒருசேரக் காணக்கிடைக்கிறது.

புராதனமான அத்வைதக் கொள்கைக்கு மஹரிஷியே ஒரு வாழும் உதாரணம். தன்னைக் கடந்த நிலை என்பதின் உண்மையை அவர் கண்முன்னே நிரூபித்துக் காட்டுகிறார். தான் கடந்த நிலையே உண்மையான நிலை, இயற்கையான நிலை என்றும் தான் என்ற நிலை பொய்யான, செயற்கையான ஒன்று என்றும் கூறுகிறார். தான் கடந்த நிலையில் இருக்கையில் ‘நான்’ என்பது மனதின் வெளிப்பாடாக இல்லாமல் தனித்து தானேயாய் நிற்கிறது. மனதின் அசைவுகளை மஹரிஷி ஒரு அறிவியலாளர் எப்படி ஒரு ஆராய்ச்சியில் பாரபட்சமன்றி கவனிப்பாரோ அதே போல கவனிக்கிறார். அத்தகைய தனித்த பார்வை மனதை உடனேயே அமைதிபடுத்தி, நிலைநிறுத்தவும் செய்து விடுகிறது.

தான் என்ற நிலை கடந்த நிலையை மஹரிஷி மிக கச்சிதமாக நிறுவுகிறார். பேச வேண்டும் என்ற அவசியம் ஏற்பட்டாலொழிய பேசுவதில்லை, அதுவும் வெகு குறைவாகவே. மெளனம் என்பது அவர் வரையில் இருத்தலின் மிக சக்தி வாய்ந்த வெளிப்பாடு, அதில் பேச்சு என்பது ஒரு தடையே. மெளனம் என்பதின் சக்தியை வெகு கச்சிதமான முறையில் வெளிப்படுத்துகிறார். வருபவர்களில் யாராவது ஒரு பிரச்சினையைக் கூறி உபாயம் தேடுகையில் அவருக்கு பதிலேதும் அளிக்காமல், பேசாமல் ‘தான்’ என்ற இயற்கை நிலையில் அமர்ந்து விடுகிறார் மஹரிஷி. மெளனம் என்பதன் முழு தாத்பரியமாகவே தான் ஆகி விடுகையில் வந்தவர் தன்னுடைய மனமும் மஹரிஷியிடமிருந்து வெளிவரும் சக்தியில் உள்ளடங்கி அமைதியில் ஊறி, தன்னுடைய பிரச்சினைக்கு ஒரு வழியைத் தானே கண்டு கொள்கிறார். ஒரு வார்த்தை கூட பேசத் தேவையில்லாமல் தன் கவலை தீர்ந்து எந்த மாய சக்தி தன்னுடைய உதவிக்கு வந்தது என்று வியந்த வண்ணம் விடைபெறுகிறார்.

ஸ்தூல உலகின் அணு தான் என்பது. இப்படி தான் என்பதில் இருந்து விலகி இருத்தல் இவ்வளவு சக்தி தருமானால், அந்த தான் என்பதே இல்லாமலிருந்தால்?! அண்ணாமலை வாழும் மஹரிஷி இதற்கு பதில் தருவார்.
அண்ணாமலை வாழும் மஹரிஷி இதற்கு பதிலுமாவார்!

One thought on “ரமண மஹரிஷியுடன் நான் – 9 – சஞ்சீவ ராவ்

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out /  Change )

Google photo

You are commenting using your Google account. Log Out /  Change )

Twitter picture

You are commenting using your Twitter account. Log Out /  Change )

Facebook photo

You are commenting using your Facebook account. Log Out /  Change )

Connecting to %s